A Federación Galega de Confrarías de Pescadores nace da necesidade de contar con unha sola voz capaz de defender os intereses de tódolos profesionais da pesca artesanal e do marisqueo en Galicia, apostando por unha explotación racional dos recursos pesqueiros e marisqueiros e pretendendo ser a verdadeira interlocutora das Confrarías e Federacións nela integradas coas Administracións Estatal e Autonómica, tratando de implantar estratexias de futuro para manter a capacidade e o esforzo pesqueiro co obxecto de acadar un desenvolvemento sostible dos recursos.

Foi fundada en Novembro do ano 2004 ó abeiro do art. 12º da lei 9/1993, do 8 de xullo, de Confrarías de Pescadores de Galicia e do Decreto 261/2002, de 30 de xullo, polo que se aproban as normas reguladoras das confrarías de Pescadores e as súas Federacións.

A Federación ten o carácter de corporación de Dereito Público, sen animo de lucro, dotada de capacidade xurídica e plena capacidade de obrar para actuar no marco territorial que lle é propio, sen que elo supoña unha perda da propia personalidade por parte das tres Federacións Provinciais que a integran.

O obxecto da Federación Galega de Confrarías de Pescadores é a coordinación, xestión e representación dos intereses económicos e sociais do sector pesqueiro-marisqueiro de Galicia, e esta composta polas 3 Federacións Provinciais e as 62 Confrarías de Pescadores Galegas o que é igual a 20.000 profesionais da pesca de baixura e do marisqueo . O proceso de constitución dunha entidade como esta supuxo un pulo de importantes consideracións para un sector tan imprescindible na economía galega como é o da pesca artesanal e o marisqueo.